పసందైన రోజు

బహుకాల బ్రేక్  తరువాత  మళ్ళీ   నా  బ్లాగాభిమానులకు   బ్లాగాయనమః

ఈ వారం  ‘బ్లాగవతం ‘ ఇంకా రాయలేదు!  అని  నా నేస్తం  ప్రశాంతి  నాకు వాట్సాప్ లో కామెంట్  వదిలింది .  భలేవుంది కదండీ?  ‘బ్లాగవతం’ అనే  ఈ కొత్త  పదం.  తనకి   ఓ వీరతాడు వేస్తూ  ముందుకెడదాం.

అరవై  వడిలో పడి  నేటికి   సరిగ్గా  రెండు సంవత్సరాలవుతున్నా ,  పర్మనెంట్ బుగ్గచుక్కతో   ఇప్పటికీ  ఎప్పటికీ  'సంతూర్ సుందరి'  మా అమ్మ.  అని నేనంటే తననెరిగిన   వారందరూ  నాతో  ఏకీభవిస్తారనుకుంటా .

ఏడుగురి సంతానంలో  చివరిదానిగా పుట్టి,  ఆరుగురు సంతానమున్న ఇంట  పెద్దకోడ లిగా మెట్టి,   తనదైన ముద్ర  వేసుకున్న  అమ్మకి  అందరూ అక్కరే . వీరెందుకిలావున్నారూ?  వారెందుకు అలా లేరూ ?  అని  అసమదీయులు -తసమదీయులు  అనే  వ్యత్యాసం  లేకుండా ప్రతీ ఒక్కరిగురించీ  నిరంతరం  ఆయాస  ప్రయాస   పడిపోయే   మనస్తత్వం  ఆమెది.  

తను  అనుకున్నట్టు  పైచదువులు  చదువుకుని  వుండి  వుంటే,  తప్పక   ఓ మంచి లాయర్  అయివుండేదని   తరచూ   ‘ఉచ్ ‘లు  కొడుతూవుంటుంది.   చాలా విషయాలమీద  తను  కనబరిచే   కుతూహలం,  వ్యక్త  పరిచే  నిర్దిష్టమయిన అభిప్రాయాలు ,  తను పడే  అవిరామ ఆందోళన , అన్నిటికీ మించి  తనకి తట్టే  ఆలోచనలు చూసి   తన  లాయర్  కల  పాపం  సమంజసమే   అనిపిస్తుంటుంది  మాకు.  

అమ్మకి  కొత్త  ఎప్పుడూ వింతే  అయినా , పాత మటుకూ ఎప్పటికీ రోతకాదు . తనదగ్గర   దశాబ్దాల  నాటి  పురాతన  వస్తువులతోపాటూ,  మార్కెట్లోకి  వచ్చే  లేటెస్ట్ వన్నీ  కోకొల్లలు.   కొత్త వస్తువులని  చూడటం,  ముచ్చటపడటం,  భీభత్సబేరాలాడి   లాటు లో   కొనటం,  ఇరస్తా పరస్తా  అందరికీ   అవి కానుకలుగా   ఇవ్వటం  - ఇవన్నీ తనకు  విపరీతమయిన  ఆనందాన్నిచ్చే   ఆనవాయితీలు.  పైపెచ్చు   తను  కానుకలుగా  ఇచ్చినవి   అందరూ   అపురూపంగా  వాడుతున్నారా?  లేదా?  అనే  ‘అత్యంతాపత్రయం’ కూడా  లేకపోలేదు . 

భోజ్యేషు మాత  అనే నానుడి కి   నిర్వచనంలా  ఉంటూ  విశ్రమించక,  ఇన్నేళ్ళ  తన పాకశాస్త్ర ప్రవీణ్యా నికి    ఇప్పుడు కూడా  ‘వసుంధర  మరియు బుల్లితెర సౌజన్యంతో’   కొత్త కొత్త మెరుగులు  దిద్దుతూ,   ప్రయోగాలు చేస్తూ ,  రకరకాల  భక్ష్య  (కొరుక్కు తినేవి),  భోజ్య (కలుపుకు తినేవి),  లేహ్య (నాకుతూ తినేవి),  చోడ్య  (జుర్రుతూ తినేవి),  పానీయాలని  ఎప్పటికప్పుడు   కోసరికోసరి  వడ్డిస్తూ  వుంటుంది.   చాలా బావుంది!   అనే ప్రశంస వచ్చిందా ?   ఎలా చేసారు?   అనే ప్రశ్న ఎదురయిందా?   అంతే!  రెట్టించిన ఉత్సాహంతో  ఇంకొంచం పెద్ద ఎత్తున  మళ్ళీ   భారీ ప్రయత్నం  మొదలుపెట్టి   అడిగిన వారింటికి   రవాణా చేసే   ఆమెచేతికి  నిజంగా  ఎముక లేదనే చెప్పాలి .

చుట్టూరా  మనుషులూ , బోలెడు కబుర్లే   తనకు  కొండంత బలం   అని  తనదైన  ధోరణిలో   పలుమార్లు   నొక్కి   వక్కాణిస్తూ  వుండే  మా అమ్మకి  మీ  అందరి తరపున కూడా  అఖిలమైన  మధురమైన  పుట్టినరోజు శుభాకాంక్షలు  తెలుపుతూ ....

మళ్ళీ కలుస్తా !